उत्तरगया–४ का ८० बाढीपीडित परिवारलाई एनआरएनएको राहत सामग्री वितरण
उत्तरगया–४ का ८० बाढीपीडित परिवारलाई एनआरएनएको राहत सामग्री वितरण
राहत तथा मानवीय सहयोग अभियानको ४३औँ दिन, ३२ देश तथा संस्थाबाट ७ करोड १० हजार ६२१ रुपैयाँ संकलन
काठमाडौं, असोज २१ । गैरआवासीय नेपाली संघ (एनआरएन) को राहत तथा मानवीय सहयोग अभियानको ४३औँ दिनमा भोटेकोशी बाढीले प्रभावित रसुवाको उत्तरगया–४ का ८० बाढीपीडित परिवारका लागि राहत सामग्री वितरण गरिएको छ । राहत सामग्रीमा भान्सामा प्रयोग हुने सामग्री, ग्यास चुल्हो, ग्यास सिलिन्डर र प्रेसर कुकरलगायत रहेका एनआरएनले जनाएको छ ।
राष्ट्रिय समन्वय परिषद् (एनसीसी) फिलिपिन्स, नेपाल डेभलपमेन्ट एकेडेमी (एनडीए) र स्टिचिङ नेपाल फन्ड्स, नेदरल्यान्ड्सको सहयोगमा यो राहत सामग्री उपलब्ध गराइएको हो । एनआरएन महिला संयोजक रश्मी थापा, फिलिपिन्सका कोषाध्यक्ष प्रेम लामा र सदस्य इभान अमात्यलगायतको टोलीले रसुवा पुगेर उत्तरगया–४ का वडाध्यक्ष अमर बुलनलाई सामग्री हस्तान्तरण गरेको थियो । त्यसपछि प्रत्यक्ष रूपमा पीडितलाई उक्त सामान बाडिएको छ।
एनआरएनका अनुसार गत भदौ १० गतेको भोटेकोशी बाढीबाट प्रभावितका लागि पूर्वप्रतिबद्धता अनुसारको सहयोग रकम प्राप्त हुने क्रम जारी छ । भोटेकोशी–रसुवा बाढी २०२६ को वित्तीय प्रतिवेदनअनुसार यस अभियानका लागि कुल ९ करोड ३९ लाख ६६ हजार २२६ रुपैयाँ प्रतिबद्धता प्राप्त भएको छ । त्यसमध्ये हालसम्म ७ करोड १० हजार ६२१ रुपैयाँ संकलन भइसकेको छ ।
रकम पठाउने देशहरूमध्ये बेलायत सबैभन्दा अगाडि छ, जहाँबाट ५३ लाख ४३ हजार २४४ रुपैयाँ २५ पैसा संकलन भएको छ । दोस्रो स्थानमा रहेको कतारबाट ४६ लाख ६ हजार ८८३ रुपैयाँ र तेस्रो स्थानमा रहेको अस्ट्रेलियाबाट ३१ लाख १ हजार ५८१ रुपैयाँ ७६ पैसा प्राप्त भएको छ । जापानबाट २८ लाख ८७ हजार, क्यानाडाबाट २७ लाख ३ हजार ४०७ रुपैयाँ ५० पैसा, बहराइनबाट २५ लाख ७९ हजार ३२८ रुपैयाँ र चीनबाट २५ लाख रुपैयाँ संकलन भएको छ ।
यस्तै न्युजिल्यान्डबाट २१ लाख ५२ हजार ८९९ रुपैयाँ ७३ पैसा, स्पेनबाट २० लाख ४३ हजार ८१६ रुपैयाँ ८० पैसा, स्विट्जरल्यान्डबाट १८ लाख ८२ हजार ६७२ रुपैयाँ ९१ पैसा र हङकङबाट १८ लाख ७७ हजार २३२ रुपैयाँ ५० पैसा प्राप्त भएको छ । स्टिचिङ नेपाल फन्ड्स (नेदरल्यान्ड्स) ले १८ लाख ५५ हजार २८० रुपैयाँ ९७ पैसा, स्विडेनले १८ लाख ३१ हजार ५३५ रुपैयाँ र नर्वेले १७ लाख ८९ हजार ८४२ रुपैयाँ ९६ पैसा सहयोग जुटाएका छन् ।
अन्य सहयोगीमध्ये इराकबाट १४ लाख ९ हजार ११७ रुपैयाँ २४ पैसा, ओमानबाट १३ लाख १५ हजार, फिलिपिन्सबाट १२ लाख, दक्षिण कोरियाबाट ११ लाख १० हजार ८१२ रुपैयाँ, लक्जेम्बर्गबाट १० लाख ४६ हजार ५४८ रुपैयाँ ८६ पैसा र साउदी अरेबियाबाट १० लाख रुपैयाँ संकलन भएको छ । डेनमार्कबाट ९ लाख १९ हजार ३०५ रुपैयाँ ८५ पैसा, टर्कीको युरोपेली क्षेत्रका नेपाली संघबाट ७ लाख ५० हजार ३३७ रुपैयाँ, सेशेल्सबाट ७ लाख १६ हजार २४ रुपैयाँ, कंगोबाट ७ लाख रुपैयाँ, संयुक्त अरब इमिरेट्सबाट ६ लाख ५८ हजार ६६३ रुपैयाँ र म्यानमारबाट ६ लाख १ हजार रुपैयाँ प्राप्त भएको छ ।
बेल्जियमबाट ५ लाख ११ हजार ६९७ रुपैयाँ १९ पैसा र इजरायलबाट ५ लाख ४ हजार ३८५ रुपैयाँ संकलन भएको छ । आयरल्यान्ड, रुस, थाइल्यान्ड र नेदरल्यान्ड्सले भने प्रत्येकले ५ लाख रुपैयाँ सहयोग गरेका छन् ।
