साइप्रसमा पढ्ने नेपाली विद्यार्थीको हितमा शिक्षामन्त्रीसँग राजदूतको वार्ता
साइप्रसमा पढ्ने नेपाली विद्यार्थीको हितमा शिक्षामन्त्रीसँग राजदूतको वार्ता
उच्च शिक्षामा सहकार्य विस्तारबारे छलफल, एनओसी र उपाधि समकक्षता प्रक्रिया सहज बनाउन मन्त्रालय सक्रिय
काठमाडौँ, १० कात्तिक। शिक्षा तथा खेलकुदमन्त्री सस्मित पोखरेल र नेपालका लागि साइप्रसका गैरआवासीय राजदूत इभागोरस भ्रीयोनिडेसबिच उच्च शिक्षाको क्षेत्रमा सहकार्य विस्तार तथा साइप्रसमा अध्ययनरत नेपाली विद्यार्थीका सवालमा छलफल भएको छ। सिंहदरबारस्थित शिक्षा तथा खेलकुद मन्त्रालयमा मङ्गलबार भएको शिष्टाचार भेटवार्तामा दुई देशबिचको द्विपक्षीय सम्बन्ध र आपसी हितका विषयमा पनि कुराकानी भएको थियो।
भेटमा साइप्रसका विभिन्न विश्वविद्यालय तथा उच्च शैक्षिक संस्थामा अध्ययनरत नेपाली विद्यार्थीलाई अध्ययनका क्रममा आवश्यक सहयोग उपलब्ध गराउने, उनीहरूको हित संरक्षण गर्ने र सम्भावित समस्या समाधानका लागि सहजीकरण गर्ने विषयमा विचारविमर्श भयो। साइप्रस नेपाली विद्यार्थीका लागि उच्च शिक्षा हासिल गर्ने गन्तव्य मुलुकमध्ये एक भएकाले त्यहाँका विद्यार्थीलाई आवश्यक सहजीकरण गर्न साइप्रस सरकारको तर्फबाट सहयोग गर्ने विषयमा पनि छलफल भएको छ। दुवै पक्षले उच्च शिक्षाको क्षेत्रमा विगतदेखि हुँदै आएको सहकार्यलाई निरन्तरता दिँदै आगामी दिनमा थप विस्तार गर्ने विषयमा पनि विचार आदानप्रदान गरेका थिए।
मन्त्री पोखरेलले विदेशमा उच्च शिक्षा अध्ययन गर्न जाने नेपाली विद्यार्थीका लागि वैदेशिक अध्ययन अनुमतिपत्र (एनओसी) उपलब्ध गराउने तथा विदेशबाट प्राप्त शैक्षिक उपाधिको नेपालमा समकक्षता निर्धारण गर्ने प्रक्रिया सहज बनाउन मन्त्रालयले आवश्यक काम गरिरहेको बताए। उनले विगतमा त्रिभुवन विश्वविद्यालयबाट हुँदै आएको शैक्षिक उपाधिको समकक्षता निर्धारणसम्बन्धी काम अहिले विश्वविद्यालय अनुदान आयोगमार्फत भइरहेको जानकारी दिँदै यस प्रक्रियामा आवश्यक नीतिगत सुधारका काम पनि भइरहेको उल्लेख गरे।
राजदूत भ्रीयोनिडेसले नेपाल र साइप्रसबिचको आपसी हित तथा द्विपक्षीय सम्बन्धलाई थप सुदृढ बनाउँदै उच्च शिक्षाको क्षेत्रमा सहकार्य विस्तार गर्ने विश्वास व्यक्त गरे।
