रास्वपा महाधिवेशन नसकिँदा प्रतिनिधि सभा बैठक फेरि स्थगित

रास्वपा महाधिवेशन नसकिँदा प्रतिनिधि सभा बैठक फेरि स्थगित

काठमाडौं । राष्ट्रिय स्वतन्त्र पार्टी (रास्वपा) को पहिलो महाधिवेशन तोकिएको समयमा सम्पन्न हुन नसक्दा प्रतिनिधि सभाको बैठकमा असर परेको छ। बैठकको मिति यसअघि नै दुई पटक स्थगित भइसकेको थियो।

आज दिउँसो १ बजे बैठक राखिएको भए पनि रास्वपाको महाधिवेशन टुङ्गिन नसकेकै कारण पुनः सारिएको हो। संघीय संसद् सचिवालयका प्रवक्ता एकराम गिरीले शनिबार बिहान ११ बजेसम्म बैठक स्थगित गरिएको जानकारी दिए।

"मन्त्री र सांसदहरू अहिले पनि चितवनमै बस्नुभएको छ, त्यसैले बैठक भोलि बिहानसम्मका लागि सारिएको हो," गिरीले बताए।

चितवनको भरतपुरमा असार ७ गतेदेखि सुरु भएको रास्वपाको प्रथम महाधिवेशनमा हालसम्म ९९ केन्द्रीय सदस्य निर्वाचित भइसकेका छन्, तर पदाधिकारीहरूको निर्वाचन भने अझै बाँकी नै छ।