हत्याकाण्डको छानबिनमा आफ्ना नेता पर्ने डरले जनता समाजवादी पार्टीभित्र भूकम्प

हत्याकाण्डको छानबिनमा आफ्ना नेता पर्ने डरले जनता समाजवादी पार्टीभित्र भूकम्प

गौर हत्याकाण्डको छानबिन हुनेभएपछि जनता समाजवादी पार्टीभित्र भूकम्प गएको छ ।

सरकारले मंगलबार गौर हत्याकाण्डका पीडितसँग पाँच बुँदै सम्झौता गर्दै छानबिन गर्ने निर्णय गरेसँग जसपाभित्र तरंग पैदा भएको हो । हत्याकाण्डमा संलग्न भनिएका उपेन्द्र यादव हाल जसपाका अध्यक्ष छन् ।

जसपाले आज आकस्मिक बैठक बोलाएको छ । जसपाले सरकारले हत्याकाण्डको छानबिन गर्ने निर्णय गरेसँग अब कसरी अगाडि बढ्ने भन्नेबारेमा छलफल हुने बुझिएको छ । तत्कालीन मधेसी जनअधिकार फोरम र माओवादीनिकट मधेसी राष्ट्रिय मुक्ति मोर्चाले ७ चैत २०६३ मा एकैदिन रौतहटको गौर नगरपालिका–५ स्थित राइस मिल्सको चौरमा सभा आयोजना गरेका थिए ।

फोरमले उपेन्द्र यादवलाई प्रमुख अतिथि बनाएको थियो । यादव त्यतिबेला फोरमका अध्यक्ष थिए । सभा हुने दिन बिहान ११ बजेदेखि फोरमका कार्यकर्ताहरू लाठीसहित जुलुस निकारेर गौर नगर परिक्रमा गरे । दिउँसो २ बजेतिर माओवादीको पनि जुलुस निस्कियो । फोरम र माओवादीको जुलुस अदालत चोकनिर जम्काभेट हुँदा दुवैले एक अर्कालाई ताली बजाएर स्वागत गरेका थिए ।

एउटै चौरमा दुवै पक्षले १०० मिटरको दुरीमा मञ्च बनाएका थिए । फोरमको सभा पहिला सुरु भयो । माओवादीको जुलुसले नगर परिक्रमा गरिरहेको थियो । करिब २:०५ बजेतिर फोरमका १५–२० जनाको समूहले माओवादीको मञ्च तोडफोड गरे । आफ्नो मञ्च तोडफोड गरेको देखेपछि माओवादीका कार्यकर्ताहरूले पनि राइस मिलको चौरमा सभा सुरु भएको फोरमको मञ्च तोडफोड गर्न थाले ।

माओवादीले मञ्च तोडफोड गर्न थालेको केही समयमा नै मञ्चको विभिन्न कुनाबाट गोली चलेको र बम विस्फोट भएको थियो । त्यसपछि दुवै पक्षको सभास्थल रणभूमिमा परिणत भयो । त्यसक्रममा माओवादीका कार्यकर्ताहरूको क्रुर ढंगले हत्या भयो । २७ जना माओवादी कार्यकर्ताले ज्यान गुमाए । जसमा ५ महिला र २२ पुरुष थिए । त्यस्तै ५३ जना घाइते भएका थिए ।