प्रधानमन्त्री कपको उपाधि जित्न एपीएफले दियो कोशीलाई ११५ रनको चुनौती

प्रधानमन्त्री कपको उपाधि जित्न एपीएफले दियो कोशीलाई ११५ रनको चुनौती

काठमाडौँ । प्रधानमन्त्री कप महिला टी–२० राष्ट्रिय प्रतियोगितामा विभागीय टोली नेपाल एपिएफले कोशी प्रदेशलाई १ सय १५ रनको लक्ष्य दिएको छ । कीर्तिपुरस्थित त्रिवि मैदानमा टस जितेर ब्याटिङ रोजेको एपिएफले निर्धारित २० ओभरमा ७ विकेट गुमाएर १ सय १४ रन बनायो । 

उसका लागि इन्दु वर्माले ४७ बलमा ६ चौका र एक छक्काको मद्दतमा ५३ रन बनाइन् । यस्तै, ज्योति पाण्डेले २७, रोमा थापाले १४ रन जोडे । बाँकी ब्याटरले भने दोहोरो अंकमा समेत रन बनाउन सकेनन् । बलिङमा कोशी प्रदेशकी अप्सरी बेगमले ह्याट्रिक लिइन् । उनले अन्तिम ओभरमा सोनु खड्का, नेरी थापा र इन्दु वर्मालाई आउट गर्दै ह्याट्रिक पूरा गरिन् । अलिसा खादियाले दुई, रुबिना क्षेत्री र निशा साहले एकरएक विकेट हात पारे । एपिएफले अपराजित रहँदै फाइनल खेलिरहेको हो । उसले पहिलो क्वालिफायर खेलमा कोशी प्रदेशलाई ५२ रनले हराएको थियो ।  

यस्तै, कोशीले दोस्रो क्वालिफायरमा साबिक विजेता सुदूरपश्चिम प्रदेशलाई ९ विकेटले हराएर फाइनलको यात्रा गरेको थियो । आज कोशीलाई एपिएफसँग बदला लिने मौका छ ।  नेपाल क्रिकेट सङ्घ (क्यान) ले महिला क्रिकेटमा पहिलोपटक राउन्ड रोविन लिगका आधारमा प्रतियोगिता सञ्चालन गरेको हो । जसले गर्दा खेलाडीले धेरै खेल खेल्न पाएका छन् ।