साझाले बनायो १.१ मेगावाट बिजुली खपत गर्ने चार्जिङ डिपो,४० विद्युतीय बस सञ्चालनमा

साझाले बनायो १.१ मेगावाट बिजुली खपत गर्ने चार्जिङ डिपो,४० विद्युतीय बस सञ्चालनमा

काठमाडौँ । साझा यातायात सहकारी संस्था लिमिटेडले ४० वटा विद्युतीय बस सञ्चालनमा ल्याएको छ । मंगलबार उपप्रधानमन्त्री तथा भौतिक पूर्वाधार मन्त्री रघुविर महासेठले डिपोटको उद्घाटन गरेका हुन् ।

चीनबाट आयात गरिएका ९ मिटर लामा ४० वटा बस चार्जिङ स्टेसनको अभावमा सञ्चालनमा आउन सकेका थिएनन् । यसका लागि आवश्यक १.१ मेगावाट क्षमताको चार्जिङ डिपोट पनि साझाले निर्माण गरेको छ । साझा यातायातले नेपालमै पहिलो पटक १.१ मेगावाट क्षमताको चार्जिङग डिपोट निर्माण गरेको हो ।

त्यसमा २४ वटा समानान्तर चार्जिङ पोइन्ट रहेको छ । अहिले सञ्चालनमा आउने बसमा २६ सिट रहेको र ४५ मिनेटमा बस फुल चार्ज हुने जनाइएको छ । एक पटक फुल चार्ज गरेपछि २०० किलोमिटरसम्म गुड्न चल्न सक्ने साझाले जनाएको छ ।

साझाले २०७९ असोज २२ गते चीनको सिएचटिसी किनविङ अटोमोबाइल कम्पनी लिमिटेडसँग ४० वटा बस खरिदका लागि सम्झौता गरेको थियो ।सो सम्झौतामा कम्पनीसँग बस र आवश्यक चार्जर खरिद गर्ने र पाँच वर्षसम्म मर्मत गर्ने उल्लेख छ । 

बसभित्र होचो (लो फ्लोर) रहेकाले अपाङ्गता भएका व्यक्ति उक्लिन र ओर्लन सजिलो हुन्छ । बसभित्र ह्विलचेयर राख्नका लागि पनि स्थान रहेको छ । मोबाइल चार्ज गर्ने ठाउँ, गन्तव्यका बारेमा जानकारी र अरु सूचना देखिने गरी बोर्डको व्यवस्था गरिएको छ । अरु बसभन्दा यी बस यात्रुका लागि बढी आरामदायी रहेको छ ।