काँग्रेस वा एमालेले देशको साझा शत्रु बन्ने चेष्टा नगरेकै वेश : सुमना श्रेष्ठ

काँग्रेस वा एमालेले देशको साझा शत्रु बन्ने चेष्टा नगरेकै वेश : सुमना श्रेष्ठ

काठमाडौँ। पूर्वसांसद सुमना श्रेष्ठले नेपाली कांग्रेस र नेकपा (एमाले)लाई देशको एक मात्र साझा शत्रु बन्ने चेष्टा नगर्न चेतावनी दिएकी छन्।

ताजा जनादेशको लागि सिंगो नेपाली समाज तयार भइसकेको अवस्थामा ठूला राजनीतिक दलका ‘स्वार्थी र सत्तालिप्सामा डुबेका नेताहरू’ले संसद पुनर्स्थापनाको बहस चलाउनुलाई उनले ‘भाद्र २३ को युवा क्रान्तिको मर्म विपरीत’ कार्य भनेकी छन्। 

‘नेपाल र विश्वको ईतिहास साक्षी छ। ‘प्रतिक्रान्ति’ को नेतृत्व गर्ने तत्वहरु विरुद्ध सामान्य जनताहरु विभाजन रेखाहरु भन्दा माथि उठेर गोलबद्ध हुन्छन्,’ उनले स्मरण गराएकी छन्, ‘त्यसैले काँग्रेस वा एमालेले यो देशको एक मात्र साझा शत्रु बन्ने चेष्टा नगरेको वेश।’

सामाजिक सञ्जालमार्फत श्रेष्ठले निर्वाचनको निष्पक्षतामाथि शंका गर्नुलाई ‘जनता समक्ष जान नसक्ने हत्यारा, भ्रष्टाचारि, कायर अपराधिक तत्वहरुको निकृष्ट बहाना’ मात्र भएको दाबी गरेकी छन्। उनले आफूलाई लोकतान्त्रिक भन्ने तर लोकतान्त्रिक चरित्र देखाउन नसक्नेहरू लोकतन्त्रको अभ्यासबाट भाग्न खोजेको नेपाली जनताले प्रष्टसँग बुझेको समेत उल्लेख गरेकी छन्।

शान्तिपूर्ण निकासका लागि एक कदम अगाडि बढिसकेको नेपाली समाजलाई द्वन्द्वतिर लैजान आफ्ना भातृ संगठनहरूलाई उक्साउनु ‘प्रतिक्रान्ति’ को तयारी गर्नु मात्रै भएको उनको भनाई छ।