ठुला भनिएका कम्युनिस्ट पार्टीका नेतृत्व दलाल पुँजीवादसँग बिकिसके : घनश्याम भुसाल

ठुला भनिएका कम्युनिस्ट पार्टीका नेतृत्व दलाल पुँजीवादसँग बिकिसके : घनश्याम भुसाल

काठमाडौँ । पुनर्गठित नेकपा एकीकृत समाजवादीका संयोजक घनश्याम भुसालले कम्युनिस्ट पार्टीको नेतृत्व सही नहुँदा कम्युनिस्ट आन्दोलन कमजोर भएको बताएका छन् ।

बिहीबार राजधानीमा भएको पार्टी एकता सभामा बोल्दै भुसालले दलाल पुँजीवादसँग नेतृत्वको लसपस हुँदा आन्दोलन कमजोर भएको निष्कर्ष निकाले । ‘ठुला भनिएका कम्युनिस्ट पार्टीका नेतृत्व दलाल पुँजीवादसँग बिकिसकेका छन् । उनीहरू दलालसँग उदार छन् । बुर्जुवा राजनीति, चालचलनसँग,उठबससँग उदार छन् । तर आफ्नै पार्टीभित्र अनुदार छन् । पार्टीभित्र लोकतन्त्रको अभ्यास गर्दैनन् । बरु बाहिरका प्रतिक्रियावादी, दलाल पुँजीवादीसँग सौदाबाजी गर्छन् । एमालेले कस्ता मान्छेलाई टिकट दिन्छ र पार्टीभित्र कस्तालाई कारबाही गर्छ भन्ने कुरा फेहरिस्त लामो छ’, उनले भने ।

भुसालले त्यस्ता नेताहरूलाई इतिहासको कठघरामा उभ्याउन सकिएमात्र एमालेको व्यक्तिवादी दक्षिणपन्थी र माओवादीको अवसरवादी सत्तामुखी दक्षिणपन्थीको विकल्पमा ठुलो भूमिका खेल्न सकिने बताए । 

नेपालमा न्यायाधीशहरू नेता जस्तो, नेता बिचौलिया जस्ता  भएकाले जनताको आकांक्षा पुरा गर्न नसकिएको उनले स्पष्ट पारे । त्यसको आक्रोश जेनजी आन्दोलनमार्फत पोखियो भुसालले बताए । उनले भने, ‘जेनजी आन्दोलनको फाइदा लोकप्रियतावादी, पुनरुत्थानवादीले उठाउन खोजे । त्यसकै परिणाम भदौ २४ गते विध्वंस मच्चियो । फेरी राजनीति पुरानै दलहरूको हातमा गयो भने देश झन् डरलाग्दो द्वन्द्वमा जाने खतरा छ ।’