रास्वपा महाधिवेशन– ८० विद्युतीय मेसिनबाट हुने केन्द्रीय सदस्यको मतदान
रास्वपा महाधिवेशन– ८० विद्युतीय मेसिनबाट हुने केन्द्रीय सदस्यको मतदान
एभरेष्ट हेडलाइन्स
एभरेष्ट हेडलाइन्स
काठमाडौं । राष्ट्रिय स्वतन्त्र पार्टी (रास्वपा)को महाधिवेशनमा यसपालि विद्युतीय मेसिनमार्फत मतदान हुने भएको छ ।
आइतबारदेखि सुरु भएको महाधिवेशन एक दिन थपिँदा अब बुधबार मात्रै मतदान सम्पन्न हुने भएको हो । पहिलो चरणमा सभापति र केन्द्रीय सदस्यका लागि मतदान हुने तय भएकामा सभापति पदमा रवि लामिछाने निर्विरोध निर्वाचित भइसकेका छन् ।
अब बाँकी रहेको ९९ केन्द्रीय सदस्य पदका लागि विद्युतीय मेसिनबाट भोटिङ हुनेछ । यसका लागि रामलक्ष्मण इनोभेसन कम्पनीको प्रविधि प्रयोग गरिनेछ । उक्त कम्पनीका सञ्चालक लक्ष्मण रिमालका भनाइअनुसार मतदानमा जम्मा ८० विद्युतीय मेसिन खटाइनेछन्, जो हाल तयारी अवस्थामा छन् ।
रिमालका अनुसार उम्मेदवारको अन्तिम सूची प्राप्त भएलगत्तै मेसिनमा नाम प्रविष्टि (इन्ट्री) गर्ने काम थालिनेछ । सामान्य अवस्थामा यसका लागि १५ घन्टासम्म लाग्ने भए पनि अन्य प्राविधिक तयारी र परीक्षण पहिल्यै सकिएकाले अब नामसूची प्राप्त भएको ६ घन्टाभित्रै इन्ट्री पूरा गर्न सकिने उनको दाबी छ ।
यसैबीच, रास्वपाको केन्द्रीय निर्वाचन आयोगले बिहानसम्म पनि उम्मेदवारहरूको प्रारम्भिक नामावली सार्वजनिक गर्न सकेको छैन । नामावली सार्वजनिक भएपछि दाबी-विरोधका लागि समय दिइने र त्यसको छानबिन सकिएपछि मात्र अन्तिम नामावली जारी हुने प्रक्रिया रहेको छ । त्यसपछि मात्र आयोगले मेसिनमा नाम प्रविष्टिका लागि सूची उपलब्ध गराउनेछ ।
यी सबै प्रक्रिया पूरा हुँदा पहिलो चरणको मतदान अपराह्नपछि मात्र सुरु हुने देखिन्छ । केन्द्रीय सदस्यका ९९ पदका लागि हालसम्म ४०० भन्दा बढीले उम्मेदवारी दिएका छन् । पहिलो चरणको मतदान सकिएपछि मात्र पदाधिकारी छनोटका लागि दोस्रो चरणको निर्वाचन कार्यक्रम अघि बढ्नेछ ।
