कोशी प्रदेशमा सत्ता उथलपुथल: मुख्यमन्त्री परिवर्तनको दबाब, कार्की डटे
कोशी प्रदेशमा सत्ता उथलपुथल: मुख्यमन्त्री परिवर्तनको दबाब, कार्की डटे
मुख्यमन्त्री परिवर्तनको दबाब, कार्की डटे
कोशी प्रदेशको यो कथा नेपाली राजनीतिको एउटा दोहोरिने चक्रझैं देखिन्छ जहाँ कुर्सी बद्लिन्छ, अनुहार बद्लिन्छ, तर कथा उही दोहोरिन्छ। सात वर्षमा नौ सरकार भन्नु त झन्डै हरेक दस महिनामा एउटा नयाँ मुख्यमन्त्रीको शपथ र विदाइ हो। यति छिटो कि प्रदेशका जनताले नयाँ मुख्यमन्त्रीको नाम राम्रोसँग सम्झिनुअघि नै अर्को परिवर्तनको चर्चा सुरु भइसक्छ। रोचक कुरा के भने, हरेक पटक "स्थिरता ल्याउने" वाचासहित नयाँ अनुहार आउँछ, तर विडम्बना यस्तै कि स्थिरताको खोजीमा नै अस्थिरता कोशीको स्थायी परिचय बनिसकेको छ।
एभरेष्ट हेडलाइन्स
एभरेष्ट हेडलाइन्स
विराटनगर। कोशी प्रदेशको राजनीति फेरि एकपटक खल्बलिएको छ। राष्ट्रिय राजनीतिमा नेकपा (एमाले) र नेपाली कम्युनिस्ट पार्टीबीच नयाँ किसिमको सत्ता बाँडफाँट सम्झौता तयार भएसँगै प्रदेशस्तरमा पनि नेतृत्व हेरफेरको लहर सुरु भएको छ। नयाँ समझदारीअनुसार एमालेले कोशीसहित बागमती र लुम्बिनी प्रदेशको कमान सम्हाल्ने र कर्णाली तथा सुदूरपश्चिममा नेकपाले नेतृत्व लिने योजना बनेको जानकारहरूको भनाइ छ। यही समीकरणलाई टेकेर पार्टी सभापति केपी शर्मा ओलीले हालका मुख्यमन्त्री हिक्मतकुमार कार्कीको ठाउँमा ताप्लेजुङका सांसद एवं एमाले संसदीय दलका उपनेता तिलकुमार मेन्याङ्बोलाई जिम्मेवारी सुम्पिने अभिप्राय राखेका छन्। पार्टीभित्र कार्कीपछिको वरिष्ठ अनुहार मानिने मेन्याङ्बो अहिले मुख्यमन्त्रीको दौडमा सबैभन्दा अघि रहेको बताइन्छ।
तर यो प्रक्रिया सहज देखिँदैन। पार्टी नेतृत्वबाट पटक पटक दबाब आए पनि मुख्यमन्त्री कार्कीले सजिलै पद छाड्ने संकेत दिएका छैनन्, जसका कारण प्रदेश सरकार नै अन्योलमा फसेको छ। सभापति ओलीसँगको सम्बन्धमा देखिएको खटपटपछि नै उनीमाथि राजीनामाको चाप बढेको मानिन्छ, र यसैलाई सुल्झाउन ओलीले आफ्ना विश्वासपात्र, पार्टी सचिव एवं कोशी प्रदेश इन्चार्ज शेरधन राईलाई विराटनगर पठाएका थिए। यद्यपि उनको भ्रमणले पनि अपेक्षित समाधान दिन सकेन। सोमबार विराटनगरस्थित एमाले पार्टी कार्यालयमा भएको बैठकको वातावरण भने विवाद अझ गहिरिएको संकेत दिने खालको रह्यो।उक्त बैठकमा मुख्यमन्त्री कार्कीलाई आफ्नो पक्ष राख्ने मौकासमेत नमिलेको चर्चा चलेको छ।
बैठकपछि भने शेरधन राईले सार्वजनिक रूपमा विवादलाई हल्लाको परिभाषा दिँदै आफू र कार्कीबीच कुनै मनमुटाव नरहेको स्पष्ट पार्ने प्रयास गरे। उनका अनुसार यो विषय व्यक्तिगत नभई पार्टीगत निर्णयसँग जोडिएको हो र दुवैबीच दशकौंदेखिको सहकार्य कायमै रहेको उनको भनाइ थियो। उनले अघिल्लो पटक भएको तीनबुँदे सहमति कार्यान्वयनमा केही अवरोध आएको स्वीकार्दै त्यसलाई चाँडै टुंग्याइने विश्वास दिलाए।
यो घटनाक्रमले कोशी प्रदेशको लामो समयदेखिको राजनीतिक अस्थिरतालाई फेरि सतहमा ल्याइदिएको छ। प्रदेश स्थापना भएयता सात वर्षको छोटो अवधिमा नै यहाँ नौ पटक सरकार परिवर्तन भई छजना फरक-फरक मुख्यमन्त्रीले नेतृत्व सम्हालिसकेका छन्।जसले कोशीलाई देशकै सबैभन्दा अस्थिर प्रादेशिक सरकार भएको प्रदेशको रूपमा चिनाएको छ। हाल सबैको ध्यान एमालेले आन्तरिक विवाद कसरी र कहिलेसम्म सल्टाउँछ र मेन्याङ्बोको नेतृत्वमा नयाँ सरकार औपचारिक रूपमा कहिलेदेखि गठन हुन्छ भन्नेमा केन्द्रित छ।
