काठमाडौं, १९ असोज। नेपाली कांग्रेसको १५औँ महाधिवेशन आज दोस्रो दिनमा प्रवेश गरेको छ। आज बन्द सत्र चल्नुका साथै नयाँ केन्द्रीय कार्यसमिति चयनको निर्वाचन प्रक्रिया पनि थालनी हुँदैछ। आइतबार उद्घाटन सत्र सकिएपछि आज बिहान ९ बजेबाट बन्द सत्र सुरु हुने पार्टी प्रवक्ता देवराज चालिसेले बताए। उद्घाटन सत्रमा पार्टीकै देउवा समूहको उपस्थिति भने रहेन।

प्रतिनिधिका लागि बिहान ७:३० देखि ९ बजेसम्म भृकुटीमण्डपको ठूलो हलमा खाजाको व्यवस्था मिलाइएको छ। त्यसपछि सवा ९ बजेबाट खुला मञ्चमा बनेका तीनवटा हलमा बन्द सत्र चल्नेछ। सत्रमा सभापति गगन थापा, उपसभापति विश्वप्रकाश शर्मा, महामन्त्री र कोषाध्यक्षले आआफ्नो प्रतिवेदन प्रस्तुत गर्नेछन्। प्रतिवेदनमाथि प्रतिनिधिले आफ्ना धारणा राख्नेछन्। त्यसपछि विधान संशोधनका प्रस्तावमाथि छलफल हुनेछ र दिउँसो साढे ११ बजेदेखि खाना खाने समय तोकिएको छ।

यसैबीच केन्द्रीय निर्वाचन समितिले आजै साँझदेखि निर्वाचनका प्रारम्भिक काम अघि बढाउँदै छ। तालिकाअनुसार बेलुका ५ बजे मतदाता नामावली सार्वजनिक हुनेछ। त्यसमाथि ६:३० बजेसम्म दाबी विरोध दर्ता गर्न पाइनेछ भने ७:३० बजेसम्म ती उजुरीको जाँचबुझ हुनेछ। बेलुका ८:३० बजे अन्तिम मतदाता नामावली प्रकाशन गरिनेछ। निर्वाचन कार्यक्रमअनुसार मंगलबार उम्मेदवारी दर्ता हुने र बिहीबार मतदान हुने तय छ।