बाराकी ३ वर्षीया गरिमाको न्यायको माग गर्दै देशभर प्रदर्शन, तुलसीपुरमा पनि आक्रोश

बाराकी ३ वर्षीया गरिमाको न्यायको माग गर्दै देशभर प्रदर्शन, तुलसीपुरमा पनि आक्रोश

तुलसीपुरमा पनि आक्रोश

दाङ/बारा । बाराको जीतपुरसिमरा उपमहानगरपालिका–१ दसधुरेकी तीन वर्षीया बालिका गरिमा चौधरीको बलात्कारपछि हत्या भएको घटनाको विरोधमा देशका विभिन्न स्थानमा आक्रोश पोखिइरहेको छ । दाङको तुलसीपुरमा समेत स्थानीयवासी तथा नागरिक समाजका प्रतिनिधिहरू सडकमा उत्रिई बालिकालाई न्याय दिलाउन माग गरेका छन् ।

स्थानीयवासीले बालिका बेपत्ता भएको जानकारी समयमै प्रहरीलाई दिइए पनि खोजीमा गम्भीरता नदेखाइएको आरोप लगाएका छन् । यसै विषयलाई लिएर राष्ट्रिय स्वतन्त्र पार्टी (रास्वपा)का सांसद रहबर अन्सारीले संसदमा समेत प्रहरीको भूमिकामाथि प्रश्न उठाउँदै २४ घण्टासम्म पनि खोजीमा तत्परता नदेखाइएको बताएका छन् ।

घटनाको विरोधमा बुधबार बिहानैदेखि स्थानीयवासीले वीरगन्ज–पथलैया सडकखण्ड र त्रिभुवन राजमार्ग अवरुद्ध गरी टायर बालेर प्रदर्शन गरेका थिए, जुन बिहीबार पनि जारी रह्यो । आन्दोलनको क्रममा प्रदर्शनकारीले इलाका प्रहरी कार्यालय सिमरा समेत घेराउ गरेका थिए ।

राजधानी काठमाडौंको माइतीघर मण्डलमा पनि प्रदर्शन भएको थियो, जहाँ नागरिकहरूले "गरिमा चौधरीलाई न्याय दे", "बलात्कारीलाई फाँसी दे" लगायतका नाराका प्लेकार्ड बोकेका थिए । यसैगरी दाङको तुलसीपुरमा पनि स्थानीयवासी सडकमा उत्रिई बालिकाको हत्यामा संलग्नलाई कडा कारबाही र पीडित परिवारलाई न्याय दिलाउन माग गरेका छन् । थारू संघसंस्थाहरूले पनि दोषीलाई कानुनी कठघरामा उभ्याउन र मृतक बालिकाको परिवारलाई उचित राहत तथा क्षतिपूर्ति दिन सरकारसँग माग गरेका छन् ।

आन्दोलनकारीहरूले घटनामा संलग्न सबैलाई पहिचान गरी कडा कानुनी कारबाही गर्न, घटनाको निष्पक्ष छानबिन गर्दै प्रहरीको भूमिकाबारे समेत अनुसन्धान गर्न, पीडित परिवारलाई उचित राहत तथा क्षतिपूर्ति दिन र बालबालिकाको सुरक्षामा राज्यको थप जवाफदेहिता सुनिश्चित गर्न माग गरेका छन् ।

निर्दोष तथा मायालु सानी गरिमाको यसरी बितेको ज्यानले सिङ्गो देशलाई नै शोकमग्न बनाएको छ । उमेरले हिँड्न-बोल्न सिकिरहेकी, संसार बुझ्नै नपाएकी त्यो सानी परीको यस्तो निर्मम अन्त्य कल्पनै गर्न नसकिने पीडादायी छ । गरिमाको बिछोडमा हामी उनको परिवार, आफन्त र समग्र समुदायप्रति हार्दिक समवेदना व्यक्त गर्दछौं । उनको आत्माले चिरशान्ति पाओस् र यस्तो कहालीलाग्दो पीडा फेरि कुनै परिवारले भोग्न नपरोस् भन्ने कामना गर्दछौं ।

घटनाले देशभर व्यापक आक्रोश र त्रास सिर्जना गरेको छ, र प्रहरी अनुसन्धान अझै जारी रहेको छ ।

तीन वर्षकी सानी गरिमाले भोगेको यो निर्मम घटनाले समाजको अन्तरआत्मालाई नै झक्झक्याएको छ । बालबालिकादेखि महिलासम्म, दिनहुँजसो सार्वजनिक भइरहेका बलात्कार, यौन दुर्व्यवहार र यौन हिंसाका घटनाहरूले प्रश्न उठाउँछन्। हामी वास्तवमा कति सुरक्षित समाजमा बाँचिरहेका छौं?

कानुन बनेका छन्, निकायहरू खडा भएका छन्, तर पीडितले न्याय पाउन वर्षौं कुर्नुपर्ने, अपराधीले उन्मुक्ति पाउने र समाजले नै पीडितलाई दोष थोपर्ने परिपाटी अझै किन कायम छ? जबसम्म यस्ता घटनाको जड सम्म पुगेर जवाफदेहिता सुनिश्चित गरिँदैन, तबसम्म गरिमा जस्ता अनगिन्ती नानीहरूको सुरक्षाको प्रत्याभूति दिन गाह्रो हुनेछ ।